RTL-Users Choice: Bescht Pizza: Pizzeria "Um Moart", "Stella Rosa" a "Come à la Maison" heeschen d'Gewënner (2024)

Wann een eppes dem Grand-Duché net virgeheie kann, ass et, dass een hei keng anstänneg Pizza iesse kann. D'Unzuel u Plazen, wou een hei am Land eng gutt an authentesch italieenesch Pizza zerwéiert kritt, ass opfälleg héich, dat ass wuel net vun der Hand ze weisen.

Den Undeel un Italiener an eiser Gesellschaft, déi zënter de 50er Joren op Lëtzebuerg komm sinn, huet sécherlech positiv dozou bäigedroen. Zënter de 70er Joren ass et komplett normal ginn, fir mat der Famill a Frënn eng gutt Pizza an eng Pizzeria a sengem Duerf oder net wäit ewech iessen ze goen. E Stéck "Italien" ass mat eriwwer op Lëtzebuerg komm an huet eist Land ënnert anerem kulinaresch enorm markéiert a beräichert.

A sou engem Pizza-Paradäis wéi Lëtzebuerg ass et dohier ëm sou méi en Challenge, fir aus der Mass ervirzestiechen. Hei sinn déi 20 Plazen zu Lëtzebuerg, wou et eiser Ëmfro, also ronn 2.000 RTL-User no, déi beschte Pizza gëtt.

Plazen 20 - 11

Plaz 20: Antica Bari (Diddeleng)

Plaz 20: Trattoria Pizzeria V'diterraneo (Elveng)

Plaz 19: Osteria de Bivio (Schëtter)

Plaz 18: Bloen Eck (Steeën)

Plaz 17: Impasto (Soleuvre)

Plaz 16: Lamy (Ëlwen) (*Bescht Pizza am Norden)

Plaz 15: Abruzzebier (Groussbous)

Plaz 14: Bella Napoli (Luxembourg)

Plaz 13: Giancarlos Pizza (Bartreng)

Plaz 12: Tre Chiavi (Luxembourg)

Plaz 11: Niz Art Piazza (Pärel) (*Bescht Pizza am Westen)

(*) (D'Trattoria Pizzeria V'diterraneo an d'Antica Bari hu béid déi exakt nämmlecht Unzuel u Stëmme krut)

TOP 10 Pizzaen zu Lëtzebuerg

Hei d'Top 10 Plazen am Land, bei deenen et eise User no déi beschte Pizza am Land gëtt. Dës 10 Restaurante kréien dann och déi nächst Deeg en extraen "RTL-Users Choix"-Autocollant fir an d'Fënster, dass och all Client am Land weess, dass si zu den Top 10 am Land gehéieren.

Plaz 10: Chez Toni (Schifflange)

Plaz 9: Cucina & Bar Partigiano an der Stad Lëtzebuerg

Plaz 8: Cloud Factory an der Stad

Plaz 7: "Bella Ciao" an der Stad Lëtzebuerg

Plaz 6: Pizzeria "La Torre" um Lampertsbierg

Plaz 5: Pizzeria "La Romantica" zu Mutfert

Wou: Mutfert
Joer vun der Ouverture:2005
Beléiftste Pizza bei de Clienten: Pizza Contern (Schaarf Salami, 4 Fromages, Tomates cerises)
Choix vum Haus: Pizza Pata Negra (eng Margherita, mat Pata Negra, enger ibeerescher Ham drop)

Zënter 2005 geréiert de Soares Carlos d'Pizzeria "La Romantica" zu Mutfert, dee sech freet, dass säi Restaurant sou eng Unerkennung kritt. Déi frësch an einfach gudde Produiten, déi fir hir Pizza an den Asaz kommen, gi vun de Clienten erkannt a geschätzt, sou de Chef vun der Pizzeria.

Fir e Produit wéi eng gutt Pizza, wier et fir hie wichteg - niewent engem anstännegen a gutt gemaachte Pizza-Deeg- frësch a gutt Produiten ze benotzen, fir eng Pizza ze beleeën. De Kontakt mat alle méigleche soziale Schichten aus der Gesellschaft a sengem Restaurant, ass genee dat, wat him a sengem Beruff am meeschte gefält.

Plaz 4: "Cloud Factory" zu Esch

Wou: Esch/Uelzecht
Joer vun der Ouverture: 2022
Beléiftste Pizza bei de Clienten: Diavola Artigianale (schaarf Spianata-Salami a frëscher Paprika)
Choix vum Haus: Pizza Garden (Paprika-Crème, Mozzarella, Oliven, gegrillt Oberginnen), Pizza Marinara Special (gedréchenten Oregano, Knuewleck, Kaperen, Oliven, ouni Mozzerella), Pizza Il Volo (rout a giel Tomates cérise, Ueleg, Parmesan, Stracciatella a Pesto)

D'"Cloud Factory" gehéiert kloer zu den Newcomer am Pizza-Game, ma huet sech an dëser kuerzer Zäit ganz kloer zu enger vun "de" Plazen am Land, fir Pizza iessen ze goen, entwéckelt. Hir Spezialitéit ass déi neapolitanesch Pizza mam dënnem Buedem an dem charakteristesch décke, fluffege Rand, also anescht, wéi déi zu Lëtzebuerg sou beléiften a wäit verbreete Pizza Romana, mat engem liicht méi décke Buedem a méi dënnem Rand.

Ugefaangen an der Stad, ass en 2. Standuert a Form vun engem Restaurant kierzlech zu Esch entstanen, dat am Joer 2022. An dach huet et d'Cloud Factory no sou enger kuerzer Zäit op eng exzellent 4 Plaz gepackt. Och de Standuert an der Stad huet et an eis Top 20 gepackt.

Plaz 3: "Come à la Maison" an der Stad Lëtzebuerg

Wou: Stad Lëtzebuerg (*Bescht Pizza am Zentrum)
Joer vun der Ouverture: 2014
Beléiftste Pizza bei de Clienten: Pizza Diavola
Choix vum Haus: Pizza Bronte (Mozzarella fior di latte, Burrata ,Pistasch-Crème , Pistaschen, Basilikum)

Bronze dann fir "Come à la maison", engem Restaurant, mat engem ganz besonnesche Konzept, deen et wuel ville Leit am Land ugedoen huet. Hei kritt ee jo net nëmme Pizza an Nuddelen, et handelt sech heibäi éischter ëm e kulinaresche Showroom, an deem ee sou gutt wéi alles ugebuede kritt, op dat een Loscht huet. Fir den Enzo Pantaleo, Pizzaiolo am Restaurant, ass et eng Éier, dass d'Leit dann och grad seng Pizzaen sou ze schätze wëssen.

Den Erfolleg vun dësem Restaurant ass, niewent der riseger Unzuel un héichwäertegen Iess-Choixen, den italieeneschen Charakter, deen an all Eck vum Showroom ze fannen ass. Déi charakteristesch an extrem beléifte Pizzaen, déi de passionéierte Pizza-Bäcker aus Italien hei kreéiert, sinn ouni Zweiwel en elementare Bestanddeel dovunner. Déi exzellent Placéierung an eiser Ëmfro ass wuel de beschte Beweis.

Plaz 2: Restaurant "Stella Rosa" zu Zolwer

Wou: Zolwer (*Bescht Pizza am Süden)
Joer vun der Ouverture: 1992
Beléiftste Pizza bei de Clienten: Pizza Diavola / Pizza Margherita
Choix vum Haus: Pizza Maison (Am Moment: Hausgemaachte Salsiccia, agemaachten Tomaten, gebroden Zwiwwelen a Moschterzooss)

De Chef vum "Stella Rosa", de Guillaume Garnier, freet sech enorm iwwert eng 2. Plaz, well et d'Cliente waren, déi gewielt hunn a soss keen. Clienten hunn hien och initial eréischt op eise Vott opmierksam gemaach, dat an deem hie massiv zu der Ëmfro ugeschwat an de Restaurant op de soziale Medien dacks getaggt gouf.

Eleng fir an den Top 10 vum Land ze sinn, wier eng richteg Unerkennung fir d'Pizzeria zu Zolwer, enger absolutter Institutioun am Minett, wann et drëms geet, fir eng gutt Pizza ze kréien. Héichwäerteg Produiten, déi richteg Technik an en Holzuewen, deen ëmmer méi seele gëtt, sinn déi Punkten, déi fir de Guillaume Garnier déi perfekte Pizza ausmaachen. D'Votten an eiser Ëmfro ginn ëm Recht.

Plaz 1: Pizzeria "Um Moart" zu Réimech

Wou: Réimech (*Bescht Pizza am Osten)
Joer vun der Ouverture: 2010
Beléiftste Pizza bei de Clienten: Pizza Ciccio (Schaarf Salami, Ham, Ënnen, Oliven an en Ee), Pizza Capricciosa (schaarf Salami, Ham, Champignon an Oliven)
Choix vum Haus: Pizza Bufala (Mozzarella di bufala,Rucola, Tomates cerises)

Déi beschte Pizza am Land, sou de Leit no, déi bei eiser Ëmfro matgemaach hunn, kënnt vun der Musel, nämlech vu Réimech. Fir de Renato Nazzaro eng grouss Freed an eppes, mat deem hien absolut net gerechent hätt. D'Léift fir de Produit an den "Detail", ass fir hien onverzichtbar, fir eng gutt Pizza ze maachen. Dobäi komme frësch Qualitéitsproduiten an Zäit, Zäit déi den Deeg einfach brauch, fir zum Schluss, déi perfekt Pizza ze kreéieren. An hei schwätze mer net vun 1-2 Stonnen... Den Deeg vum Renato Nazzaro muss op d'mannst 24 Stonne rouen, nëmme sou kréien d'Gäscht déi Pizza, déi se bei him gewinnt sinn.

Den eidelen Teller vum Client, deen eidel zeréck an d'Kiche geet, ass fir de Renato Nazzaro déi gréisste Freed an och déi gréisste Motivatioun a sengem Beruff als Patron a Pizzaiolo an der Pizzeria um Moart, eiser Nummer 1 fir hei am Land eng perfekte Pizza z'iessen.

Hei d'Top 20 Plazen fir eng Pizza z'iessen op ee Bléck!